عمر الشريف بيحكي فـ لقاء تلفزيوني عن أعز أصدقائه فبيقول "فـ مرة كنت بعدي الطريق مع واحد صاحبي، فمخدتش بالي وأنا بعدي لقيته قام راجع هو الأول وقالي حاسب، بس ملحقتش واتخبطت فـ كتفي، وعلى نفس الطريق فـ مرة تاني مع صاحب تاني، شدني بسرعة من غير ما يتكلم، عرفت إن الأخرس هو عديم الفعل مش عديم الكلام". - الـ "Humans of New York" بينزلوا يعملوا تقارير مع الناس فـ شوارع نيويورك، سألوا بنت عن معنى الصداقة بالنسبلها قالتلهم "لو إتطلعت على محادثاتنا لوجدتها خالية من المشاعر، إن صديقتي لا تقول إشتقت إليك، بل أجدها ترن جرس الباب لأفتح فتحتضنني دون النطق بكلمة ". - بيحكى دكتور عزت صبرى عن صاحب له من أولى إبتدائي لحد دلوقت معايا إسمه "محمود سليمان"، هو باعد نفسه عن السوشيال ميديا، محمود كان لما بيلاقيني متضايق بييجي يقعد جنبي ويُسكت، أو يجيب أكل يحطه بينا وناكل وإحنا ساكتين من غير ما نتكلم ولا نعاتب ولا يقولي إنت المفروض كنت تعمل كذا، يوم ما أختي "مها" توفت جه وقف معايا من أول الدفنة لحد التلات أيام عزا، وقف وشد على إيدي ولقيته مش مُتمالك نفسه وبيعيط معايا، مؤمن إن الكلام لا بيصبر ولا بيقدم ولا بيأخر وإنه كل شبه بعضه، حضني وهو ساكت وبس، يوم ما أفرح وتحصل مناسبة كان ييجي يشاركني، مابيقوليش الكلام المحفوظ بتاعهم من مبروك وأمثاله، يوم ما آخد قرار وألجأله يفكر معايا بصوت عالي، ويوم ما أقع وتمُر عليا فترات إكتئاب بيقومني من غير ما يقولي معلش. ـ الكلام فـ كل العلاقات بقى شبه بعض جداً ، سكريبت وحافظينه وبيتكرر فـ كل المواقف اللي عادة لا بيقدم ولا بيأخر، خدنا مناعة من كتر ما سمعناه، لكن فـ ناس بتسقينا وتكبرنا بأفعالها مش بكلامها، بنحتاجهم جنبنا بسكوتهم، ناس مبتتكلمش بس بتعمل، صاحب بيشدك قبل ما يقولك حاسب، صاحب يقومك قبل ما يقولك إنت اللي عملت فـ نفسك كده، صاحب يقف جنبك قبل ما يقولك معلش، يقويك بسكوته ، يقويك بأفعاله، خلافاته مش بتكمل جزء من الثانية والخصام ملغي من القاموس بتاعه، أفعالك وتصرفاتك عنده مش محتاجة تبرير ومخليك تشيله من لستة الناس اللي بنحطهم فـ حسابنا وكلامنا ومواعيدنا والرسميات، مبرراتك عنده دايماً مقبولة والزعل مش من الخيارات بالنسبة ليه، نفسك المتهالكة هو بيبنيها ويريحها ومش بيزودها، مش مستني منك حاجة وغير ملزم تجاهه، مبيشغلش أي مساحة من عقلك، فـ قلبك وبس..


Hossam mahmoud
كلام جميل جدا و فعلا لازم تختار صحابك كويس عشان هما هيكملوا معاك للاخر

بتكسف @ اتكلم مع الناس حتى لو قريبين مني بتكسف منهم جدا و الناس مبتفهمش انه كسوف خالص


Hossam mahmoud
الكسوف زيادة عن اللزوم بيبقي رخم خليكي اجتماعيه اكتر و في الحدود بردو و خلي روحك حلوة اضحكي و هزري عادي مفيش حاجه تتكسفي منها من اصحابك
Useer
خليكي زي ماانتي كدا احسن كبنت، في ناس نفسهم يوصلو المرحله اللي انتي فيها دي ومتخديش كسوفك دا ضعف او عجز انك تتعاملي مع الناس "وما اعتاد قوم الاختلاط الا وذهبت معه مروءة الرجال وحياء النساء"
Eng.Hassan
كتير بيواجه نفس مشكلتك بس حلها محتاجة تحتكي بالناس وتصاحبي وتبقي اجتماعية عشان الكسوف او رهبتك تبدا تدريجيا تختفي

انا ليس لدي أي مشكله انا هنا لأساعدكم في حل مشاكلكم